ეს გვეხმარება გამოვყოთ ძირითადი ამოცანები მომავალი ექვსი თვისთვის და მიმდინარე ამოცანებიდან, თუ მივხვდით, რომ რამე ახლა არ არის რელევანტური, შეგვიძლია მომავლის ჭრილში გადავიტანოთ. მაგალითად, გვინდა წავიკითხოთ კარლ სეიგანის კოსმოსი, დღეს უნდა დაგვეწყო, მაგრამ მივხვდით, რომ ძალიან ბევრი პრიორიტეტული ამოცანა გვაქვს და ზედიზედ უკვე ერთი კვირაა ამ ამოცანას სახვალიოდ ვდებთ, ვუყურებთ უფრო შორეულ გეგმებს და თუ ვხედავთ, რომ მაგალითად ოქტომბერში დაგეგმილი გვაქვს ერთკვირიანი დასვენება, ეს ამოცანა იმ პერიოდისთვის გადაგვაქვს. ბულით ჟურნალის წარმოებისას, მნიშვნელოვანია იგნორირება არ გავუკეთოთ შეუსრულებელ ამოცანებს და თუ ერთი და იგივე ამოცანის შესრულებას ზედიზედ რამდენიმე დღის განმავლობაში  ვერ ვახერხებთ და სახვალიოდ ვდებთ, გავაანალიზოთ საერთოდ გვინდა კი ამის გაკეთება? საჭიროა? იქნებ საერთოდ არაა მნიშვნელოვანი? და თუ მაინც მნიშვნელოვანია, იქნებ ჯობდეს ცოტა შორს გადავიტანოთ, როცა მის შესრულებას მართლაც შევძლებთ. 

და აქ მთავარ საკითხს უნდა შევეხოთ _ ბულით ჟურნალი არ არის უბრალოდ ორგანიზების მეთოდი. მისი საშუალებით უნდა გავერკვეთ საკუთარ სურვილებში. მისი დევიზია: "აღწერე წარსული, მართე აწმყო, შექმენი მომავალი" (Track the past, Order the present, Design the future). ბულით ჟურნალის მთავარი ღირსება ჩემი აზრით ისაა, რომ მისი სტრუქტურა ღიაა. არ არსებობს წინასწარ დახაზული ფურცლები, რომლებიც მიგითითებს რომელ გრაფაში რა უნდა ჩაწერო, შეგიძლია აიღო ნებისმიერი წერტილებიანი ბლოკნოტი და მისი წარმოებისას საკუთარი, შენ ცხოვრებაზე ზუსტად მორგებული მეთოდი იპოვო, მაგრამ ყველაზე მნიშვნელოვანი მაინც მისი პერიოდული წაკითხვაა. იმისათვის, რომ ბულით ჟურნალი მართლა დაგეხმაროს, აუცილებელია ორი მნიშვნელოვანი პირობის დაცვა: 1. ის უნდა აწარმოო ყოველ დღე; 2. გარკვეული პერიოდულობით უნდა გამოყო დრო და წაიკითხო რა მოხდა განვლილ დღეებში. ეს შეიძლება გააკეთო კვირაში ერთხელ ან თვეში ერთხელ, მაგრამ მთავარი აქ ისაა, რომ დაინახო შენი ცხოვრება, რას აკეთებ, რას ვერ აკეთებ და გაერკვე რატომ აკეთებ ან არ აკეთებ ამ ყველაფერს. შენი ამოცანაა მექანიკური, გაუაზრებელი ცხოვრებიდან გამოხვიდე და შეხედო მის ზუსტ ანარეკლს. სწორედ ამაშია ამ მეთოდის უმთავრესი ძალა და უპირატესობა. ერთ გვერდზე თავმოყრილია ყველაფერი, რაც გააკეთე, რაც ვერ გააკეთე, შენი შეხვედრები, შესრულებული და შეუსრულებელი ამოცანები, გადადებული საქმეები, პირადი და საქმიანი ამოცანები. როდესაც მის წაკითხვას იწყებ, ხედავ შენი ცხოვრების მთელ კონტექსტს. ხედავ ისეთს, როგორიც ის ნამდვილად არის და შეგიძლია შენ თავს ჰკითხო ეს ის არის, რაც მართლა გინდა? რატომ აკეთებ ამ ყველაფერს? რას შეცვლიდი? 

ბულით ჟურნალი უბრალოდ დაგეგმვაში კი არ გეხმარება, არამედ ის ცხოვრების მართვის ინსტრუმენტი ხდება. ამას აკეთებ ყოველ დღე 15 წუთის დათმობით და შენ უკვე აღარ ხარ ბორბალში. შენ ხედავ რა მუშაობს, რა არ მუშაობს, რას აკეთებ ეფექტურად და რა არის ის, რასაც მუდმივად "ხვალისთვის" გადადებ ხოლმე და რაც მუდმივად გსტრესავს, დაუსვა შენ თავს კითხვა _ კი მაგრამ საერთოდ მჭირდება ამის გაკეთება? 

ბულით ჟურნალის უნიკალურობა იმაშია, რომ შენ თავად ქმნი საკუთარ დღიურს შენი ცხოვრების შესაბამისად. არ ხარ შეზღუდული წინასწარ გაწერილი სტრუქტურით, მოცემული არეებით ან გამზადებული საზღვრებით. ამისთვის გჭირდება მხოლოდ წერტილებიანი ბლოკნოტი და კალამი ან ფანქარი. მე მაგალითად ჩემთვის იდეალურ სტრუქტურას ორი წლის თავზე მივაგენი. ამისთვის ვიყენებ მანუსკრიპტის საჩანთე ზომის ბლოკნოტს ორი ჩანართით - წერტილებიანი რვეულით და წიგნაკით. რვეულში გავაკეთე წლიური კალენდარი და "მომავლის ჭრილი".